Abeey Axmed; Ra’iisul wasaaraha Itoobiya oo dhawaan booqasho aan horey loo sii shaacin ku yimid magaagalada Muqdisho ayaa markii uu ku laabtay dalka Itoobiya wuxuu waraysi uu siiyay tvga dalkaas, kaas oo uu kaga sheekeeyay ujeedka safarkiisa Soomaaliya.
Abeey Axmed waxa uu sheegay in madaxda dowladda federaalka ay isku afgarteen in Itoobiya iyo Soomaaliya noqdaan hal dal oo mid ah, islamarkaana la iska illoobo taariikhdii hore ee labada dal ka dhexeysay.
Ra’iisul wasaaraha Itoobiya oo u muuqday qof ku faraxsan qodobada heshiiska uu Farmaajo kasoo saxiixay ayaa sheegay iney tahay in la iska hilmaamo dagaalladii uu ku sheegay iney dhexmareen Siyaad barre iyo Mingiste, balse xaqiiqadu waxay tahay iney dagaalladaas dhexmareen Umadda Soomaaliyeed iyo Itoobiya.
Qodobada heshiiska dowladda Federaalka iyo tan Itoobiya ay wada gaareen waxaa kamid ah in Itoobiya lagu wareejiyo afar dekadood oo ku yaala koonfurta iyo bartamaha Soomaaliya, waana qodobka uu aad ugu farxay Abeey isagoona ku faanay iney ka bixi doonaan bad la’aanta.
Shacabka Soomaaliyeed ayaa aad uga wallaacsan arintan, waxaana baraha bulshada iyo goobaha ay dadku ku kulmaan aad looga hadal hayaa warka kasoo yeeray ra’iisul wasaaraha Itoobiya.
