Khasaara lixaad leh ayaa ka dhashay weerar hor leh oo xoogaga Al Shabaab ay ka fuliyeen gudaha dhulka Soomaalida NFD ee Kenya Gummeysato.
Wararka ka imaanaya gobolka loo bixiyay gobolka Waqooyi Bari Kenya ayaa sheegaya in weerar dhabbagal ah oo Ciidamada Xarakada Mujaahidiinta Al Shabaab ay u dhigeen ciidamo katirsan Melleteriga Kenya uu sababay dhimashada in kabadan 10 askari.
Weerarka oo ka dhacay deegaanka Kutuloow ee hoos taga degmada Wajeer ayaa lagu gubay gaari nuuca xamuulka ee ciidanka Xambaara ah oo ay la socdeen ciidamada Kenya, war rasmi ah oo kasoo baxay Xarakada Shabaabul Mujaahidiin ayaa lagu sheegay in 15 askari Kenyaan ah lagu dilay weerarkii maanta.
“weerar ay mujaahidiintu ka fuliyeen deegaan hoos yimaad Wajeer waxaa lagu dilay 15 askari oo katirsan saliibiyiinta Kenya, mujaahidiinta ayaa burburiyay gaari xamuul ah oo ciidamada cadawga ah la socdeen”ayaa lagu yiri war kasoo baxay Xarakada Al Shabaab.
Dhinaca kale dowladda Kenya ayaa si horudhac ah u sheegtay in ugu yaraan 8 askari looga dilay weerarkii Katuula waxaana isisoo taraya khasaaraha ka dhashay weerarkan ka dhacay gobolka ‘Waqooyi Bari’.
Billaawgii bishaan weerar ka dhacay deegaanka Libooya Kenya ayaa lagu dilay ugu yaraan 10 askari oo katirsan ciidamada GSU-da ee sida Melleteriga utababaran kadib qarax miino oo lala eegtay.
