Ciidamada Booliska Itoobiya ayaa helay gaari uu ku jiro meydka agaasimihi mashruuca biyo xireenka Al Nahda Simegnew Bekele kaas oo isagoo la dilay ku dhex jiray gaarigiisa.
Booliska ayaa hareereeyay gaariga waxaana la sheegayaa inuu yaallay fagaaraha Meskel ee bartamaha magaalada caasimadda ah ee Addis Ababa.
Ilaa hadda lama oga qaabka loo dilay iyo cidda dishay, laakin waxaa muuqanaya in nidaamka dalka Itoobiya uu wajahayo taxaddiyo gudaha ah oo ka soo horjeeda dhaqaaqa siyaasadeed ee R/Wasaare Abiy Axmed.
Isla fagaarahaas ayaa dhawaan waxaa isku day dil kaga badbaaday R/Wasaaraha Itoobiya kaas oo bam lagu tuuray xilli uu ku sugnaa banaan bax weyn oo isaga lagu taageerayay, booliska ayaa markaasi xiray saraakiil sar sare oo lala xiriiriyay dhacdadaasi.
Falanqeeyeyaal badan ayaa rumeysan in xubno ka gadoodsan isbadallada siyaasadeed ee dalka oo u xaglinaya dhanka Jabhadda Tigreeda iney ku lug leeyihiin dhacdooyinkan, waxaana laga yaabaa iney horseeddo qalaanqal hor leh oo ka billowda dalka.
