Warbixin ay daabacday Majalladda caanka ee laga leeyahay dalka Mareykanka (foreign Policy) ayaa diiradda lagu saaray taakdarrida heysata ciidamada dowladda Federaalka Soomaaliya iyo mustaqbalka maamulka Villa Somalia marka ay ciidamada AMISOM dalka isaga baxaan.
Ugu horrayn warbixinta ayaa sheegaysa in dhowaan golaha ammaanka Q.Midoobe ay waqti kordhin usameeyeen ciidamada Midowga Afrika ee xoogga ku jooga Soomaaliya illaa sanadda 2019.
foreign Policy waxay sheegaysaa in Soomaaliya ay tahay dal aan ciidan laheyn waxaaba shaqan waayay isku dayo dhowr ah oo waxa loogu yeero beesha caalamka ay ku doonaysay in ay ciidan ugu dhistodowladda Federaalka si loo baajiyo qarashka tirada badan ee ku baxa ciidamada shisheeye.
Warbixintu waxay sheegaysaa in dowlado dhowr ah ay hub ka iibiyaan dowladda Federaalka balse hubkaas aan lagu keydin bakhaarada ciidamada dowladda taas bedelkeedna loo weeciyo maleeshiyo qaab beeleed u abaabulan marmarka qaarna hubka qaab suuq madoow ah lagu kala iibsado.
Caddeymaha layaabka leh waxaa bixiyay Korneel katirsan ciidamada AMISOM gaar ahaan taliyaha guutooyinka Uganda kaasi oo dowladda Federaalka lameel dhigay Doofaar.
“Dowladda Soomaaliya waa sida doofaarka oo kale Haddii aad nadiifiso iyadaa iswasaqeyneysa, Haddii aan dalka isaga baxnana waxaa la wareegi doona Alshabab” sidaas waxaa yiri sarkaal Ugaandheys ah.
Taliyaha Yugaandheyska ayaa soomaaliya la barbar dhigay dalka Afghanistan isagoo sheegay in Taalibaan ay la wareegto meel walbo oo Ciidamada Afghnaistan ay baneeyaan.
Markii ugu horeysay AMISOM waxaa Soomaaliya laga howlgeliyay 2007-dii waxyna dagaal la galeen Al Shabaab oo dowladda ka soo horjeeda, wixii intaas ka dambeeyayna waxaa loo sii kordhinayay sharciga ay ku joogayaan Soomaaliya, hada waxaa lagu qiyaasaa in kabadan 22,0000 oo askari kuwaa oo ka socda dalalka kala ah Uganda, Burundi, Ethiopia, Kenya, Djibouti, iyo Sierra Leone.
Warbixinta ayaa weeraro is xigxigay oo Xarakada Al Shabaab ay maalmo ka hor ka fulisay magaalada Muqdisho ku tilmaamtay kuwa muujinaya in awoodda jihaadiga ah ay wali tahay mid aan la loodin karin islamarkaana ay fashilmeen laamaha ammaanka Dowladda Federaalka Soomaaliya.
