Iyadoo mar sii horeysay dowladda Ruushka ay shaacisay in la la’yahay diyaarad dagaal oo ay saarnaayeen saraakiil katirsan ciidamada Ruushka ayaa la ogaaday in diyaaradda ay soo dhacday kadib markii ay beegsadeen malleeshiyaad katirsan Nidaamka Nuseyriyada Bashaar Al-Asad.
Dowladda Ruushka ayaa shaaca ka qaaday in diyaaradan oo nooceedu ahaa Ilyushin-20 ay saarnaayeen ugu yaraan 15 askari oo katirsan ciidamada Ruushka ayna kusoo dhacday xeebaha bari ee badda Mediterianka.
Mar ay dowladda Ruushku ka hadlay qaabka ay kusoo dhacday diyaaradda ayay sheegtay in diyaarado uu leeyahay maamulka Yahuudda oo duqeymo ka geystay gobolka Allaadiqiyah ay isku qariyeen, difaacna ka dhigteen diyaarada Ruushka, taas oo keentay in sawaariikhdii difaaca ee lagu ridayay diyaaradda Yahuuda uu haleelo mida Ruushka.
Rushka ayaa maamulka Yahuudda dusha ka saaray masuuliyada diyaaradda laga soo riday iyo dhimashada ciidamadooda, waxayna sheegeen iney ka bixin doonaan jawaab.
Wasiirka gaashandhiga ee Ruushka oo hadlay ayaa hab dhaqanka diyaarada Yahuuda ku tilmaamay mid masuuliyad daro ah, ayna dadaal ku bixin doonaan sidii ay u ilaashan lahaayeen ciidankooda iyo diyaaradahooda.
Maamulka Yahuuda weli wax war ah kama uusan soo saarin dhacdadan iyo eedeynta Ruushka, waxaana arintan ay mugdi gelin doontaa xiriirka dowladda Ruushka iyo maamulka Yahuudda oo mudooyinkii lasoo dhaafay aad u wanaagsanaa.
