Wadanka Tanzania oo kamid ah wadamada dhaca Bariga Qaaradda Africa ayaa wararka ka imaanaya waxey sheegayaan in ugu yaraan 136 qof ay geeriyoodeen, tiro intaas ka badanna la la’yahay kadib markii doon ay saarnaayeen ay kula rogmatay Buxeyrada victoria oo qeyb ka ah wadanka Tanzania.
Doonida Rogmatay ayay wararku sheegayaan inay siday inka badan 300 oo qof, ilaa hadana waxaa la xaqiijiyey dhimashada 136 qof, iyo 37 qof oo lasoo badbaadiyey, waxaana lala’yahay dadkii saarnaa intooda kale oo loo badaniyo inay biyaha ku garqameen.
Dhacdada ayaa ka dhacday meel ku dhow Jazeerada Owkeerwi oo ku taala gudaha Buxeyrada Victoria oo lagu sheego inay tahay Buxeyrada labaad ee ugu weyn caalamka, sidoo kalena ah halka uu kasoo burqado Wabiga Nile ee isaga kala goosha wadamada Ethiopia, Sudan iyo Masar.
Warbaahinta gudaha dalka Tanzania ayaa ka dhawaajisay in doonida loogu tala galay inay qaado ugu badnaan 100 qof, balse taas badalkeeda ganacsatadii iska laheyd ay ku qaadeen xamuul dhaafsiisan xadkeeda oo gaaraya inta u dhexeeyso 300 ilaa 400 qof, taas oo keentay inay Biyaha gudahooda ku quusto kadib markii culeyska uu dhinac u batay.
Wariye ku sugan mandiqada Mawanza oo dadka doonta saarna badankood ay kasoo jeedeen ayaa sheegay in boqolaal qoys ay ku sugan yihiin xeebta Buxeyrada Victoria iyagoo sugaya khabarka uga imaan doono dadkii ehaladooda ahaa ee doonta saarnaa kuwaas oo maalinkii 3-aad ay gashay maqnaanshahooda.
Madaxweynaha Dalkana Tanzania John Magufuli ayaa amar ku bixiyey in lasoo xirxiro dhamaan ganacsatadii iska laheyd doonida rogmatay iyo masuuliyiintii dowlada ee ka gaabiyey waajibkooda ku aadan ilaalinta xeebaha wadanka ee doonta ku fasaxay in waxaas oo dad ah la saaro, isagoona ku dhawaqay Afar Maalmood oo uu ku sheegay baroor diiq qaran.
Ciidanka Police-ka iyo gudiga loo xilsaaray kiiskan ayaa shaaciyey inay gacanta kusoo dhigeen wadihii doonta oo xilliga ay rogmaneysay ka maqnaa, siyaasiyiinta mucaaradkana waxay dowlada ku eedeeyeen inay ka gaabisay gurmadki loo fidin lahaa dadka ay masiibado ku habsatay, howlaha gurmadkana ay si aad ah ugasoo daaheen waqtigii loo baahnaa.
Taliyaha ciidanka Police-ka Mandiqada Muwanza ee dhacda xeebaha koofureed ee Buxeyrada ayaa sheegay in ilaa iyo hada aan la garan Karin tirada dadka rasmiga ah ee doonta saarnaa, lana qiyaasayo inay ka badnaayeen 300 oo qof, kaliyana lasoo badbaadiyey 37 qof, taas oo kadhigan in dadka dhintay ay ka badan yihiin 270 kale.
Dhacdooyinka noocaan ah ayaa kusoo noqnoqday wadanka Tanzania, waxaana la xasuustaa in sanadki 1996 ay ku qalibantay isla buxeyrada Victoria dooni siday, dad gaaraya 894 qof, kuwaas oo dhamaantood biyaha ku dhintay, halka sanadkai 2011-kii ay xeebaha magaalada Zinzibaar ku qalibantay doon kale oo siday dad gaaraya 200 qof, kuwaas oo iyana biyaha badda ku garqamay, dhacdadii ugu danbeysana waxa ay aheyd sanadkii 2012-kii oo doon kale ay ku qalibantay xeebta magaalada Zinzibaar, halkaas oo ay ku dhinteen dad gaaraya 145 qof.
