Khasaara dhimasho iyo dhaawac leh ayaa ciidamada shisheeyaha AMISOM kasoo gaaray weerar xooggan oo lagula beegsaday gobolka Hiiraan ee dhaca bartamaha dalka Soomaaliya.
Xoogaga Al Shabaab ayaa xalay fiidkii weerar xooggan ku qaaday saldhiggadda ciidamada Jabuuti ee loo yaqaan Hiil-gaalo ay ku leeyihiin degmada Jalalaqsi.
Weerarka oo isugu jiray dagaal fool ka fool ah iyo duqeyn madaafiic loo adeegsaday ayaa sababay dhimashada hal askari iyo dhaawaca sedax kale.
War kasoo baxay Xarakada Al Shabaab ayaa lagu sheegay in weerarka oo ahaa mid kedis ah uu khasaara dhaxalsiiyay ciidamada Jabuuti “Weerar mujaahidiintu ku qaadeen saldhigga ciidamada Murtadiinta Jabuuti ee degmada Jalalaqsi ayaa sababay dhimashada hal askari iyo dhaawaca sedax kale” ayaa lagu yiri war ay baahisay Andalus.
Dad ku sugan gudaha magaalada Jalalaqsi iyo hareeraheeda ayaa sheegay in ay maqlayeen jugta qaraxyo waaweyn oo ka dhashay madaafiicda ku hoobanaysay saldhigga ciidamada Jabuuti,illaa iyo hadda wax war ah kamasoo bixin taliska ciidamada dowladda Jabuuti ee gobolka Hiiraan oo ku saabsan weerarkii xalay ka dhacay Jalalaqsi.
