Dr. Xanafi Cabdi Sheekh Aadan oo kamid ah dhaqaatiirta Soomaaliyeed ayaa ka hadlay cudurka Ebola oo dhawaan ka dillaacay Kongo DRC, kuna sii fiday wadanka Uganda.
Dhaqtarku wuxuu sheegay in cudurkan uu yahay mid dilaa ah oo si fudud ku faafa, wuxuuna muujiyay walwal uu ka qabo Alle naguma keeno’e inuu Soomaaliya soo gaaro, wuxuuna u sababeeyay ciidanka Uganda oo kamid ah askarta kusoo duushay dalka.
Waxa kaloo uu sheegay in madaxda DF ay mar walba u safraan wadankaas taasnina ay keeni karto iney cudurka usoo qaadaan wadanka. Ummadda Soomaaliyeed ayuu ugu baaqay iney feejignaan weyn ka muujiyaan cudurkan.
Ciidamada Uganda ayaa intooda badan dhex deggan magaalada Muqdisho oo ah caasimadda wadanka iyagoo sidoo kale jooga garoonka diyaaradaha ee Xamar oo ah ay si weyn uga faafin karaan maadaama ay dadka gacma-gacmeeyaan, cudurkana uu ku fido is taabashada iyo in dheecaanka qofka qaba uu gaaro qof kale oo bad qaba.
