Wararka ka imaanaya gobolka Wajeer ayaa sheegaya in halkaas uu ka dhacay weerar aad u xooggan oo lagu beegsaday ciidamo katirsan Booliska dowladda Kenya.
Ilo wareedyo ayaa xaqiijinaya in dagaalyahanno katirsan Al Shabaab ay hujuub ku asqeeyeen saldhig ay ciidamada Kenya ku leeyihiin deegaanka 50 ee hoostaga degmada Qorof Xaraar waxaana lagu soo waramayaa in dagaalku ahaa mid culus.
Hubka noocyadiisa kala duwan ayaa la isku adeegsaday dagaalka sida ay sheegeen dadka deegaanka balse illaa iyo hadda lama oga heerka uu gaarsiisanyahay khasaaraha ka dhashay weerarka.
Ciidamada Xarakada Mujaahidiinta Al-Shabaab ayaa sii laba jibaaray howlgalladooda milliteri ee ay ka fulinayaan gudaha dhulka NFD ee ay xooga ku heysato dowladda Kenya, Bishii lasoo dhaafay waxaa gobollada Mandheera,Wajeer iyo Gaarisa ka dhacay weeraro ay dhimasho iyo dhaawac ku noqdeen ciidamo isugu jira Melleteri iyo Boolis.
