Munaasabad ballaaran oo ka dhacday deegaanka Buurdhuxulle ee gobolka Bakool ayaa xarigga looga jaray qeybta koowaad ee Masjid jaamacada deegaanka.
Boqolaal qof oo isugu jiray rag iyo dumar ayaa ka qeyb galay munaasabadda lagu furayay masjidkan oo uu ku baxay qarash ku dhow nus malyuun dollar.
Masjidka oo ka koobnaan doono laba biyaano ayaa hadda ladhameystiray hal biyaano waxaana halkii mar ku dukan kara kumanaan kun oo ruux.
Guddiga dhismaha Masjid jaamaca ayaa sheegay in masjidka oo ku fadhiya masaaxo ah 34×24 uu dabooli doono baahida cibaado ee shacabka muslimiinta deegaanka.
Qarashka ku baxay masjidka badankiis waxaa bixiyay dadka deegaanka waloow ay jireen muxsiniin ku sugan dalka gudihiisa iyo dibaddiisa oo gacan ka geystay.
Guddiga dhismaha masjidka ayaa ugu baaqay shacabka Soomaaliyeed in ay ka qeyb qaataan dhismaha qeybta ka harsan masjidka si uu unoqdo masjidka ugu weyn gobolka Bakool.
