Iska hor’imaadyo culus ayaa wali ka socda deegaanno katirsan wadanka Itoobiya oo ay isku dilayaan ciidamo kawada tirsan Xabashida balse kala qeybsamay.
Wararka ka imaanaya gobolka Tigray ayaa sheegaya in dagaallo culus ay shalay gelinkii dambe illaa iyo xalay ka socdeen deegaannada kaabiga ku hayo xadka ay wadaagaan Amxaarada iyo Tigreega.
Isgaarsiinta taleefanada iyo Internetka oo go’an ayaa sababay in aan xog badan laga helin hardanka dagaal ee wadanka ka socda balse warar shaxiix ah oo ay soo gudbiyeen wariyaal ayaa sheegaya in dagaal culus uu shalay ka dhacay saldhig ay ciidamada Federaaliga Xabashida Itoobiya ay ku lahaayeen gobolka Tigray waxaana jira khasaare lixaad leh oo ciidamada dowlada lagaarsiiyay.
Ilo wareedyo ayaa sheegaya in tobanaan gaadiidka gaashaaman ah laga gubay meleteriga Itoobiya, duqeymo aan kala joogsi laheyn ayay diyaaradaha dowladda ku hayaan dhowr magaalo oo katirsan gobolka Tigray.
Diblumaasi hore uga tirsanaa wasaaradda arrimaha dibadad Mareykanka ayaa sheegay in Itoobiya ay lugaha lagashay dagaal ahli ah oo sababi kara kala daadasho maamul.
Payton Knopf oo wareysi siinayay wakaaladda wararka AP ayaa ka shanqariyay in Itoobiya ay burburi doonto haddii uu sii socdo dagaalka gobolka Tigray.
Saraakiisha maamulka Tigreega ayaa warbaahinta afkooda ku hadasha ka sheegaya in xaaladdu caadi tahay islamarkaana ay dagaalladu ka socdeen deegaanno ku dhow xadka ay laleeyihiin ismaamulka Amxaarada.
Dhinaca kale inta badan maamul goboleedyada hoos taga xukuumadda Addi Ababa ayaa ku dhawaaqay in ay taageersanyihiin howlgalka ka dhanka ah ismaamulka Tigray ee shalay uu iclaamiyay Abiy Axmed.
Bayaanno ay soo saareen ismaamullada Oromia, Amxaarada, Soomaaligalbeed,Cafarta iyo Beshanguul ayay ku sheegteen in ay isbarbar taagayaan duullaanka ciidamada Federaaliga ah ay ku qaadeen dhulka ay maamusho jabhadda TPLF oo muddo 27 sana ah wadankaas maamulaysay.
