Xog faahfaahsan oo dheeraad ah ayaa laga helayaa markab laga leeyahay wadanka Shiinaha oo lagu afduubtay qaybo ka mid ah Somalia, kaasi oo xaalufin iyo dhibaato xooggan ka waday deegaannada xeebta dhaca ee waqooyi bari Soomaaliya.
Wakaaladda wararka ee AP ayaa daabacday warbixin ku saabsan markabka Shiinaha ee lagu haysto biyaha Soomaaliya, gaar ahaan waqooyi bari ama deegaannada Puntland loo yaqaan, kaasoo hadda gacanta ugu jira kooxo kalluumeysato ah.
Ganacsade la hadlay Ap ayaa xaqiijiyay in markabka afduubka lagu haysto uu ka mid yahay ilaa 10-markab oo maamulka ashahaada la dirirka Puntland kusoo fasaxay biyaha Soomaaliya, si ay boob iyo dhibaato uga gaystaan xeebaha kuyaal deegaannada maamulkaas.
Wuxuu intaa ku daray in marka hore markabka Shiinaha oo ku duulayay calanka jaziiradda Taiwan lala aaday deegaanka Jiifle ee ka tirsan gobolka Nugaal, laba ka mid ah ilaalada ayuu sheegay inay afduubteen kaddibna ay xoojiyeen kooxo kale oo kasoo raacay xeebaha kale, dhowr goobood in la geeyay markabka ayuu sheegay, haddana la rumeysan yahay in kooxahaas ku hayaan Maraya oo ah tuulo ku taalla xeebta degmada Eyl.
Ilaa 18 xubnood oo shaqaalaha markabka ka mid ah ayay gacanta ku hayaan kooxaha Soomaalida ee gacanta ku dhigay markabka, 18-ka xubnood ayaa la xaqiijiyay in 10 ka mid ah ay yihiin dad u dhashay Shiinaha.
AP ayaa sheegtay in kooxaha afduubeyaasha ay diideen in la siiyo lacag dhan hal milyan oo Doollar, iyaga oo dalbaday adduun dhan 5 Milyan oo dollar, wallow aysan jirin bay wakaaladdu tiri xaqiijin kale oo ka timid maamullada Riddada ah ee Soomaaliya ka jira.
Kooxaha kalluumeysata oo warbaahinta la hadlay waxay sheegeen in afduubka markabkasi uu daba socday cabashooyin badan oo ay u gudbiyeen maamulka Riddada ah ee Puntland, waxay sheegeen in aan la dhagaysan cabashadooda oo dhagaha la xirtay, taasina ugu dambayntii ay keentay inay beegsadaan maraakiibta ku jirta biyaha Soomaaliya, dhibaatada xooggana ku haya kalluumeystada Soomaaliyeed.
