Waddanka Afgaanistaan, ayaa markii ugu horeysay taariikhda si rasmi ah uga mid noqday naadiga waddamada caalami ahaan soo saara naftada, ka dib markii imaarada islaamiga ah ee Afghanistan ay horumarin ballaaran ku sameysay shirkadaha maxalliga ah.
Wasaarada macdanta iyo batroolka imaarada islaamiga Afgaanistaan ayaa ku dhawaaqday inay iibisay ilaa 60 kun oo tan oo nafto ah, taasi oo qiimaheedu ku kacayo adduun dhan 30 milyan oo doollarka Maraykanka ah.
Afhayeen u hadlay wasaaraddaasi, ayaa xaqiijiyay in wasaaraddu ay dibadda u iibgeysay ilaa 60,000 oo tan oo nafto ceyriin ah, taasi oo dhowaan ay soo saartay shirkad maxalli ah.
Waxay tani kusoo beegmaysaa, xilli waziirka macdanta Imaarada islaamiga Afghaanistaan, Al-xaaji Nuura-ddiin Caziizi uu horay u shaaciyay in dalka Afghanistan uu markii ugu horeysay ka mid noqday waddamada caalamka ee soo saara shidaalka.
Waxaa xusid mudan in Afghanistan ay shidaal kasoo dhoofsan jirtay dalka dibaddiisa, si ay u daboosho baahiyaha dadkeeda ee la xiriirta naftada, dadka ku xeeldheer arimahan waxay sheegaya in Afghanistan ay dhoofinta naftada ku heli doonto malaayiin Dollar, kuwaasi oo markii hore dalkan dibadda uga bixi jiray, si ay dadkeedu ugu soo dhoofsadaan shidaal ku filan.
Tan iyo markii hoggaanka waddanka ay la wareegeen mujaahidiinta Imaarada islaamiga ah, wuxuu dalkan sannadba midka ka dambeeya ku tallaabsanayay horumaro dhan walba ah, marka laga hadlayo dhanka dhaqaalahana, waxay Imaaradu xoogga saartay dhinacyada tamarta, dhismaha kaabayaasha, macdanta, iyo beeraha.
