Maamulka Yahuudda ayaa shaaciyay in askari ka tirsan ciidankiisa lagu dilay weerar gaari-jiisiin ah oo maanta ka dhacay waqooyiga magaalada Ramallah ee dhaca Daanta-galbeed ee Falastiin.
War kooban oo kasoo baxay taliska ciidamada ee maamulka sahyuuniyadda ayaa lagu sheegay in weeraryahanka oo ahaa qof Falastiini ah uu gaari booyad ah oo shidaal sidday ku beegsaday goob basaska laga raaco.
Ciidanka gumeystaha oo ka argagaxay howlgalka lagu beegsaday ee gaari-jiirsiinta ah ayaa ciidamo dheeraad ah goobta geeyay, kuwaas oo xiray aagga howlgalka uu ka dhacay.
Hal askari oo ka tirsanaa guutada Naxshoon ayay xaqiijiyeen ciidamada Yahuudda in looga dilay weerarka maanta ka dhacay waqooyiga Ramallah ee dhacda daanta galbeed, waana mid ka mid ah howlgallada nafhurnimo ee ay fulinayaan dadka Falastiiniyiinta ah ee iska caabinta adag kula jira kayaanka sahyuuniga ee xoogga lagu dajiyay dhulalka barakaysan ee Falastiin.
Maalmo uun ka hor ayay ahayd markii nin muslim ah oo ka caraysan dilalka ay Yahuuddu sida maalinlaha ah ugu hayaan Falastiiniyiinta kana soo jeeda Urdun uu howlgal fariid ah ka fuliyay xuduudka Daanta-galbeed ee Urdun, halkaas oo uu ku dilay ugu yaraan saddex askari oo ka mid ah ciidamada ammaanka ee gumeystaha.
