War rasmi ah oo kasoo baxay dowladda Azerbaijan ayaa looga hadlay saddex markab oo ku dhawaad laba bilood ku xiran xeebaha dalka Eritrea oo ah dal ka go’doosan caalamka intiisa badan.
Wazaaradda arrimaha debadda ee waddanka Azerbaijan ayaa warqad diblumaasiyadeed oo ay kaga cabanayso maraakiibta ka xayiran u dirtay dowladda Eritrea, iyada oo u maraysa safaaradaha Itoobiya iyo Ruushka, si ay u gaarsiiyaan madaxda waddankaasi.
Maraakiibtan oo marayay kanaalka Suways kuna jeeday dalka Imaaraadka Carabta, ayaa xeebaha dalka Eritrea lagu qabtay bishii Nofeembar ee 2024, kaddib markii cimilada oo xumaaday ay sababeen inay u weecdaan biyaha Eritrea, halkaas na lagu qabtay.
Ilo wareedyo ayaa sheegay in maraakiibta saddexda ah lala qabtay ilaa 18 shaqaale ah oo la socday, kuwaas oo dhammaantood kasoo jeeda dalka Azerbaijan, shaqaalaha maraakiibta ayaa la sheegay inay la ildaran yihiin cunto yari muddo ku dhow laba bilood, taasoo ka dhigaysa xaaladdooda mid aad u adag, maadaama uu dalkan yahay mid macluul daran ay ka jirto.
