Baarlamaanka dowlada Nasaarada Faransiiska ayaa qalinka ku duugay Qodob cusub oo ku aadan waxa loogu yeero La dagaalanka Argagixisada, kaasi oo awood dheeraad ah siinaya laamaha Amniga iyo Wasaaradda arrimaha gudaha.
Qodobkan waxa uu awood badan siinayaa Ciidamada Bileyska, isagoona u ogolaanaya inay xiri karaan Masaajidda iyo Madaarista islaamiga ah ee sida ay sheegeen looga shakiyo inay ku boorinayaan waxa ay ugu yeeraan Naceybka iyo gacan ka hadalka.
Qodobkan oo ay u codeeyeen Golaha hoose ee Baarlamaanka Nasaarada Faransiiska ayaa waxaa meel marintiisa ogolaaday 415 Xildhibaan, halka ay diideen 127 kale, sida ay ku warrameen Warbaahinta dalka Faransiiska.
Wasiirka arrimaha gudaha ee Faransiiska Geeraar Kooloom ayaa sheegay in Faransiisku uu ku jiro xaalad dagaal, ayna laamaha ammaanku dhib badan kala kulmayaan ka hortagga waxa uu ku sifeeyay Xagjirayaasha Maxalliga ah iyo kuwa Ajaaniibta ah, sidaas darteedna ay lama huraan tahay in Booliisku ay heleen awoodo dheeraad ah oo xagga Sharciga ku saabsan.
Wareysi uu bixiyay Wasiirka arrimaha gudaha kadib fadhiga ay yeesheen Baarlamaanka ayaa waxa uu ku yiri : “Xildhibaannadu waxay fahmeen in khatarta maanta jirta inay tahay mid weyn, ayna waajib nagu tahay inaan Nafteenna ka illaalino Argagixisada”. Wuxuu hadalkiisa kusii daray ” Sharcigani wuxuu gacan ka geysanayaa bad baadinta Shacabka Faransiiska”.
