Agaasimihii hore ee hay’adda sirdoonka gudaha ee maamulka Yahuudda oo loo yaqaan Shin bet, Cami Ayalon, ayaa ka falceliyay adkeysiga iyo sugnaanta uu Allaah ku galladay shacabka Falastiiniyiinta, oo cudwaan adag kala kulmaya dhanka Yahuudda.
Sarkaalkan Yahuudiga ah ayaa sheegay in shacabka reer Falastiin ee ay dagaalka adag kula jiraan aysan is dhiibi doonin, sababo ku aaddan buu yiri inay yihiin dad halgankoodu yahay madaxbannaanidooda, waa sida uu hadalka u dhigaye.
Channelka 13-aad oo soo xiganayay hadalka sarkaalkan ayaa sheegay in Cami ayalon uu qiray in shacabka Falastiiniyiintu ay yihiin kuwa adkaysi badan oo aan is dhiibi doonin, sidoo kale waxa uu agaasimihii hore ee Shin Bet uu tilmaamay in kooxaha muqaawamada aysan taagi doonin calanka cad oo loo yaqaan bandiiradda nabadda.
Sidoo kale Cami ayalon ayaa sheegay in ciidamadiisu aysan ka guul keenin doonin dagaalka ka dhanka ah shacabka reer Gaza iyo garabkooda hubeysan ee iska caabinta adag kula jira ciidanka Yahuudda.
Ninkan ayaa horay usoo noqday agaasimaha guud ee hayadda sirdoonka gudaha Yahuudda ee loo yaqaan Shin Bet, sidoo kalena soo noqday taliyihii ciidanka Badda ee maamulka gumeystaha.
