Cawil Nuur Roobe (Tubaako) oo ahaa taliyihii ciidamada Police-ka magaalada Gaalkacyo ee maamulka Galmudug ayaa u geeriyooday dhaawac kasoo gaaray qarax lagula eegtay gudaha magaaladaas.
Dhaawaca Cawil kasoo gaaray qaraxa oo ahaa mid aad u culus ayaa dhaliyay in saqdii dhexe ee xalay uu ku geeriyooday mid kamid ah isbitaalladii lagu dabiibayay.
Qaraxa oo ahaa mid xoogan ayaa taliyaha Police-ka Gaalkacyo waxaa lala eegtay isagoo maraya bartamaha magaalada, sawirro Internetka lagu baahiyay ayaana muujinayay burbur gaaray gaariga.
Xarakada Mujaahidiinta Al-Shabaab ayaa sheegatay masuuliyadda weerarkan qarax ah ee lala eegtay taliyaha Police-ka magaalada Gaalkacyo ugu magacaabanaa maamulka Galmudug.
Maanta ayaa lagu wadaa in Cawil lagu aaso koonfurta magaalada Gaalkacyo, halkaas oo ah goobta lagu beegsaday taliyihii Police-ka Galmudug ee magaalada Gaalkacyo.
Mudooyinkii dambe waxay Gaalkacyo marti gelisay silsilado weeraro abaabulan oo gallaaftay nolosha saraakiil muhiim u ahaa maamulka Galmudug.
