Ciidamada millatariga Suudaan ee uu hoggaamiyo General Cabdilfataax Al-burhaan, ayaa shaaciyay inay si buuxda gacanta ugu dhigeen magaalo istaraatiiji ah oo kutaal gobolka Blue Nile ee koonfur bari ee dalka Suudaan, halkaas oo ay gacanta ku hayeen maleeshiyaadka gurmadka deg degga ah ee Imaaraadku taageero.
Warbixin uu soo saaray taliska guutada 15-aad ee ciidanka millatariga Suudan ayaa lagu yiri “Hoggaanka liwaaga 15-aad ee guutada 159-aad qeybta 4-aad ee ciidanka lugta ee ka howlgala webiga Niilka Buluuga ah, waxaa u suuragashay in mandiqada Jarwa ka xoreeyaan maleeshiyada gurmadka deg degga ah.”
Maleeshiyada Imaaradku dacmiyo ee Dacmu-sariic loo yaqaan ayaa dabayaaqadii bishii June ee la soo dhaafay la wareegay qeybo badan oo ka mida gobolka Sennar, waxay sidoo kale gaareen oo ay la wareegeen deegaano ka tirsan gobolka Blue Nile oo ay ku jiraan magaalooyinka Jarwa iyo Ruru.
Dhanka kale wargayska Sudan Tribune ayaa ilo wareedyo kala duwan kasoo xigtay in taliyaha ugu sarreeya maleeshiyaadka fallaagada ah ee Dacmu-sariic, General Maxamed Xamdaan Deglo uu muddo bil ah ku sugan yahay caasimadda Khartuum, halkaas oo uu wargaysku sheegay in uu ka abaabulayo duullaan cusub oo ka dhan ah millatariga uu hoggaamiyo Al-burhaan.
