Kadib markii ay ku jabeen dagaalladii foolka foolka ee ay kula jiraan kooxaha wax iska caabinta Falastiiniyiinta ayay ciidamada maamulka gumeystaha Yahuudda burburin xooggan ku billaabeen xabaalaha shuhadada ee ay ku gummaadeen duqaymaha wuxuushnimo ee marinka Gaza.
Ilo wareedyo ku sugan marinka Gaza ayaa soo wariyay in ciidanka Yahuudda ay cagaf-cagaf ku burburiyeen Qabuuraha xaafadda Al-namsaawi, ka hor inta aysan isaga insixaabin goobtaasi, waxaana qabuurahani ay ku yaalaan aagga cisbitaalka Al-urduni.
Wakaaladda wararka ee Anaadool ayaa sheegtay in markii ay ciidanka Yahuudda burburiyeen qubuuraha kadib, ay dib uga gurteen agagaarka xarunta caafimaad ee Naasir ee kutaal magaalada Khan Yuunis ee koonfurta marinka Qaza, waxayna halkaasi kasoo saareen xabaal-wadareedyo lagu aasay dadka muslimiinta ah.
Boqollaal ciidamo Yahuud ah ayaa isaga baxay aaggan, waxayna ku biirayaan kumannaan ciidamo ah oo isaga cararay qaybo ka mid ah marinka Gaza, kadib markii lagu jabiyay dagaallada foolka foolka ah ee ka socda gudaha Gaza.
