Itoobiya oo ah dal dhaca bariga qaaradda Africa, waxaa laga soo warinaya in uu fara kulul ku hayo cudurka duumada oo ka mid ah xanuunnada halista ah ee sababa dhimashada, waxaana bishii ina dhaaftay oo kaliya uu xanuunkan soo ritay boqollaal kun oo Itoobiyaan ah.
Tirakoob cusub oo la diiwaan geliyay ayaa muujinaya in tirada xaaladaha dadka la xanuuusan cudurkan ay gaartay 328,881 xubnood oo cusub tan iyo billowgii sannadkan 2024-ka.
Wakaaladda wararka u faafisa dalka Itoobiya oo soo xiganaysa hay’adda waxay ugu yeeraan caafimaadka adduunka ee magaceeda loo soo gaabiyo (WHO), waxay sheegtay in intii u dhaxaysay koowda bishii January illaa 28-keeda, ay xanuunkan gudaha dalkaasi ugu dhinteen 84 xubnood, kuwaas oo la diiwaan geliyey inay qabeen cudurka.
Dadka Itoobiyaanka ah waxay soo sheegeen in cudurka duumada uu aad ugu baahay dalka Itoobiya, si aad ah ugu sii xooggan yahay dhulka ka hooseeya 2 kun oo mitir, halkaas oo ay ku nool yihiin saddex meelood meel masaaxadeeda, waxaana lagu qiyaasaa dad halkaas ku nool inay gaarayaan 52 milyan oo qof.
Itoobiya, waxaa sidoo kale waqooyigeeda ka taagan xaalad aad u daran oo gaajo iyo macluul ah, halkaas oo laga soo diiwaan geliyay dhimashada boqollaal qof oo Itoobiyaan, halka ay halis ku jiraan malaayiin kale, waxaa intaas usii dheer in dalkan uu gudihiisa ka socdo colaado u dhaxeeya ciidanka millatariga iyo qaar ka mid ah qowmiyadaha ugu tunka wayn ee dega waddankaasi.
