Dab sababay khasaare hantiyeed ayaa saacadihii lasoo dhaafay ka kacay dhul beereed ku yaalla magaalada Ceerigaabo ee gobolka Sanaag.
Wararka nagasoo gaaraya magaalada ayaa waxay sheegayaan in dhul beereedka oo ku dhex yaalla magaalada in mar qura uu dabku qabsaday, kaasoo aan illaa iyo hadda la ogaan sababtiisa.
Inkastoo aanu dabku geysan khasaare nafeed ayaa haddana wuxuu gubay gabi ahaanba laba beerood oo ay miro kala duwani ka baxayeen.
Dad badan oo degaan ah ayaa gurmad sameeyay si ay uga hor tagaan in dabku uu ku fido meel hor leh waxayna ku guuleysteen ugu dambeyntii in ay baqtiiyaan.
Xilliyada jiilaalka ayaa waxaa inta badan dhacda in dabku uu ka koco goobaha ganacsiga iyo guryaha sababtoo ah waxaa socda dabayllo awood u leh in ay qaadaan dabka la dhigo meelaha halista ah.
Magaalada Ceerigaabo ayaa waxay masaafo aan dheerayn u jirta buuraha caanka ah ee Daalo iyo Surud, iyadoo dabka haatan ka kacay uu kusoo beegmayo xilli uu sidan oo kale dab u qabsaday guri ku yaalla magaalada Gabiley oo qiyaastii 54 km galbeed kaga beegan magaalada Hargeysa, halkaasoo ay ku dhaawacmeen labo caruur ah.
