Khasaare hantiyeed oo xoog leh ayaa ka dhashay dab qabsaday suuqa ugu wayn ee wadanka Itoobiya ee lagu magacaabo Maarkeeta, kaasi oo sidoo kale lagu tilmaamo in uu yahay midka ugu wayn qaaradda Afrika.
Abbaare fiidnimadii xalay ayaa mar qura laga war helay dabka xooggan oo ka kacay xarumo ganacsi oo kuyaal suuqan, kaasi oo kusii fiday dhismeyaal kale oo kuyaalla suuqa ganacsiga, taasi oo keentay khasaare baaxad leh.
Maamulka dowladda Itoobiya ee magaalada Addis-ababa ayaa howlgaliyay kooxaha gurmadka, gaadiidka damdamiska iyo diyaarado nooca kuwa qumaatiga u kaca, si loo damiyo dabkaasi.
Adeegsiga diyaaradaha helicopterada ayaa yimid markii duqa degmadaasi ay sheegtay in ciriiriga ka jira xaafadda uu dabku kacay ay keentay inay adeegsadaan diyaaradahaasi, markii gaadiidku ku adkaatay inay goobta galaan.
Ilo wareedyo ayaa soo sheegay in saacadihii ugu horreeyay uu maamulka dowladda Itoobiya ku fashilmay daminta dabka, waxaana goor dambe oo uu dabku socday ku dhawaad 4 saacadood ayaa lasoo wariyay in la damiyay dabkaasi.
Duqa magaalada Addis-ababa, haweenayda lagu magacaabo Adanech Abebe oo ka hadlaysa goobta uu dabku ka kacay ayaa sheegtay in uu jiro khasaare baaxad leh oo hantiyeed, waxayna tiri “Waxaan aad uga murugoonnay burburka hantiyeed ee dabkan ka dhashay.”.
Suuqan gubtay ayaa kuyaal xaafadda Shema Tera ee magaalada caasimadda ah ee Addis-ababa, waxaana lagu tilmaamaa suuqa furan ee ugu wayn Africa, dowladda Itoobiya wali ma bixin faahfaahin rasmi ah oo muujinaysa xaddiga khasaaraha.
Sawirro iyo muuqaallo saacadihii ugu horreeyay lagu faafiyay baraha bulshada ayaa muujinayay sida xowliga ah ee dabku ugu fidayay dhismeyaal ganacsi oo hor leh iyo burburka uu geysanayay, ganacsatada ayaa u cararayay dhanka xarumahooda si ay ugu yaraan wax uun uga badbaadiyaan hantidooda, balse dabka oo ahaa mid xoog leh ayaa saameeyay xarumo badan oo basbeeliyay.
