Magaalada Ceerigaabo ee xaruunta gobolka Sanaag waxay markale maanta marti-gelisay dagaal xoogan oo u dhaxeeyay maleeshiyaadka Somaliland iyo maleeshiyo hubeysan oo sheegay inay raacsanyihiin maamulka kale ee SSC-khaatumo la baxay.
Subaxnimadii hore ee saaka ayaa lasoo wariyay in gudaha magaaladaasi isku fara saareen labada maleeshiyo, dhawaqa hubka noocyadiisa kala duwan ee la isku adeegsanayay ayaa si wayn looga maqlayay xaafadaha ay ka kooban tahay magaalada Ceerigaabo.
Maamulka Ashahaada la dirirka ah ee Soomaalilaand, ayaa maleeshiyo badan geeyay magaalada, khasaare kala duwan ayaa lasoo warinayay, oo isugu jira dhimasho iyo dhaawac dhinacyada soo kala gaaray iyo dad shacab ah.
Dadka shacabka ah ee ku dhintay dagaalkii maantay ka dhacay Ceerigaabo waxaa ka mid ahayd Najma Xasan Muuse oo dhawaan uun ka qalin-jabisay mac-had lagu barto luuqadda Carabiga, sida ay xaqiijiyeen ehelladeedu.
Dagaalladan maanta ka dhacay Ceerigaabo ayaa soo billowday shalay gelinkii dambe, xaaladda magaalada ayaana ah mid colaad, dadka shacabka ah ayaa hadda wajahaya xaalad aad u daran, hoobiyaal ayaa kusoo dhacay guryaha dadka rayidka, sida laga dheehan karo muuqaallo la baahiyay.
