Duleedyada magaalada Ceerigaabo ee xarunta u ah gobolka Sanaag, waxaa gelinkii dambe ee maanta dib uga qarxay dagaal culus oo u dhaxeeyay laba maleeshiyo oo maalmahan ku dagaallamayay gudaha magaaladaasi.
Ilo wareedyo ayaa sheegaya in dagaalladu kasoo billowdeen ilaa 3 aag oo ka baxsan magaalada Ceerigaabo, halkaas oo ay isku fara saareen maleeshiyao kala taabacsan maamullada isku magacaabay Somaliland iyo SSC-khaatumo.
Goobjoogeyaal ayaa soo sheegaya in mid ka mida dagaalladu ay ka dhaceen deegaan lagu magacaabo Dhuur Madare oo kuyaal duleedka Ceerigaabo, khasaare labada dhinac soo kala gaaray ayaa lasoo wariyay.
Dhinacyadu waxay kala sheegteen guulo, inkastoo aysan jirin xog rasmi ah oo xaqiijinaysa inta uu gaarsiisan yahay khasaaraha kala gaaray, bale ilo kala duwan ayaa sheegay in dagaalladu ahaayeen kuwa culus oo la isku adeegsanayay hubka culus iyo midka fudud.
Dagaalladan gelinkii dambe ee maanta ka dhacay duleedka Ceerigaabo, ayaa kusoo beegmaya xilli maalmo ka hor ay magaaladaasi ku dagaallameen laba maleeshiyo oo kala taabacsan maamullada fadhiyadoodu yihiin Hargaysa iyo Laascaanood.
