Magaalada Beledweyne ee xarunta u ah gobolka Hiiraan, waxaa lasoo wariyay inay ku dagaallameen laba maleeshiyo oo kala taabacsan maamul goboleedka Hirshabeelle iyo kuwa la magac baxay Hiiraan State, halkaas oo ilaa iyo imika laga dareemayo xaaladda dagaal ee u dhaxaysa labadan maleeshiyo.
Dagaalka, ayaa si gaar ah uga dhacay xerada Lamagalaay oo la sheegay inay ku suganyihiin maleeshiyada uu madaxa u yahay murtad Cali Jayte Cismaan ee isku magacaabay Hiiraan State, waxaa lasoo wariyay in xerada soo weerareen maleeshiyaadka maamulka Hirshabeelle ee uu madaxa u yahay murtad Guudlaawe.
Ilo wareed ku sugan magaalada Beledweyne, ayaa soo sheegay in isku dhacyadan hubeysan ee ka dhacay magaaladan ay ka dhasheen khasaare kala duwan oo isugu jira dhimasho iyo dhaawac soo gaaray labada dhinac, inkastoo aan si rasmi ah loo shaacin inta uu la egyahay khasaaraha, dhanka kale dad shacab ah oo ku dhaawacmay dagaalada labada maleeshiyo ee murtadiinta ah ku dhexmaray Beledweyne ayaa la geeyay xarumaha caafimaadka ee magaaladaasi.
Sidoo kale saaka waxaa kala xiran ganacsiga magaalada Beledweyne, waxaa lasoo wariyay in wasddooyinka qaar lagu jaray dhagxaan, xaalad dagaal oo xooggana laga dareemayo gudaha magaaladaasi, suuragalna ay tahay in markale ay foodda is geliyaan labada maleeshiyo ee kala taabacsan Hirshabeelle iyo kuwa Cali Jayte.
