Kooxaha wax iska caabinta Falastiiniyiinta ee ka dagaallamaya marinka Gaza, ayaa dagaallo culus la galay ciidamo ka tirsan kuwa Yahuudda oo ku sugnaa qaybo ka mid ah xaafadaha dhaca koofur-galbeed ee marinkaasi.
Ilo wareedyo maxalli ah, ayaa xaqiijiyay in kooxaha wax iska caabintu ay weerar culus ku qaadeen goobo ay ciidanka gumeystuhu kaga suganyihiin xaafadda Karam Abuu Saalim ee dhacda koonfurta marinka Gaza.
Waxay sidoo kale iska hor’imaadyo culus ka dhaceen xaafadda Al-Zaytuun ee dhacda koonfurta Gaza, halkaas oo laga maqlayay dhawaqa hubka kala duwan ee ay isu adeegsanayeen kooxaha wax iska caabinta iyo ciidamada Yahuudda.
Dagaallada foolka foolka ah ee ka dhacay xaafadda Al-Zaytuun, waxa dhinac socday qaraxyo culus oo ay muqwaamadu la beegsanaysay ciidamada maamulka gumeystaha.
Muqaawamadu waxay sheegtay, in dagaalyahan ka tirsan kooxda uu toogtay askari sahyuuni ah oo marayay waddada 10-aad ee kutaal koonfurta Talil-hawaa, ee dhacda galbeedka marinka Gaza, taasi oo keentay in dhaawac culus uu soo gaaro askariga Yahuudiga ah.
Dagaallada iska hor’imaadka ah iyo qaraxyada, waxaa sidoo kale dhinac socday howlgallo madaafiic ah oo kooxaha wax iska caabintu ay ku beegsadeen fariisimo ay ciidanka Yahuuddu ku leeyihiin agagaarka Al-baydar, oo ah deegaan dhaca waddada Al-Rashiid ee galbeedka magaalada Gaza.
