Cabdullaahi Cabdulle oo ku magac dheeraa Dhaga-cadde kana mid ahaa dadka Soomaaliyeed ee darawalnimada uga shaqaysan jiray waddanka Koongo, ayaa la xaqiijiyay in si arxan-darro ah loogu dilay qaybo ka mid ah waddankaasi.
Wararka ka imaanaya waddanka Koongada Dimuqraadiga ah ayaa sheegaya in qofkan muslimka ah ee kasoo jeeda Soomaaliya uu dhacdadan xanuunka badan la kulmay, kaddib markii uu shil galay, shilkaasi oo lasoo wariyay in uusan gaysan wax khasaare ah.
Ninkan ayaa ka mid ahaa darawallada kaxeeya gaadiidka dadweynaha, markii uu shilkaasi galay kaddib dad caraysan oo dalka Koongo u dhashay ayaa lasoo wariyay in isla goobtii uu shilka ku galay ay ku weerareen oo ay kala degeen baabuurkii uu watay oo ah nooca kuwa xamuulka qaada.
Mid ka mid ah dadka Soomaaliyeed ee ku dhaqan dalkaasi oo dhacdada ka warbixinayay ayaa sheegay in Cabdullaahi Cabdulle oo kasoo baxay magaalo lagu magacaabo Kumaado oo ka tirsan dalkaasi uu marka hore gaari ku dhacay, shilka kaddib ay baaburkii uu wadaha ka ahaa ay kala degeen dadka u dhashay waddankaasi, isla goobtana si arxan darro ah ugu gowraceen.
Wuxuu intaas ku daray in ninkan ay safarkaasi ku wehlinayeen gaadiid kale oo ay wadeyaal ka ahaayeen dad Soomaaliyeed, kuwaas oo si dirqi ah kaga baxsaday goobta, isagoo tilmaamay in xitaa loo diiday inay soo qaataan maydka qofkaasi.
