Dab iyo caro, waa halkudhig lagala soo dhex baxay kitaabka munxarifka ah ee Injiil, taas oo Donald Trump uu adeegsaday hanjabaad uu jeediyay madaxweynaha kuuriyada Wuqooyi, balse maalina kuma fakarin inuu noqon doono ciwaanka buug gilgilay tiirarka Aqalka cad ee uu isagu madaxweynaha ka yahay.
Dab iyo caro, gudaha Aqalka cad ee Trump waa ciwaanka buug cusub oo dhawaan soo baxay, kaas oo uu qoray wariye katirsan wargeyska Newyork Times oo lagu magacaabo Michel Wolff, kagana sheekeeyey laga soo billaabo maalintii uu Donald isku soo sharxay doorashada madaxtinimo illaa markii uu la wareegay Aqalka cad.
Buugan ayaa markii uu durba soo baxay waxaa uu aad ugu baahay caalamka, isagoona tirade la daabacay si dhaqsi ah lagu kala qaatay, waxaana qoraaga buuga uu macluumadyada ku dhex jira kitaabka uu ka halay waraysiyo dhaadheer oo gaaraya 200 oo waraysi oo uu la yeeshey saraakiiil sar sare oo katirsan Aqalka cad, qaar kamid ah Qaraabada Donald Trump iyo dad aqoon wanaagsan u leh madaxweynaha, waana waxa kitaabka siiyay caanimada iyo in la rumeysto waxa ku dhex jira.
Kadib markii Donald Trump uu go’aansaday inuu isku sharxo madaxtinimada Maraykanka wuxuu damcay in saaxiibkiisii hore ee Roger Ailes oo ahaa mas’uul hore oo katirsan shirkadda Fox News uu ka dhigo madaxda ol olaha doorashadiisa, balse ninkan wuu ka biyo diiday soo bandhigista saaxibkiisa Donald, isagoo ku andacoonaya in Trump uu yahay qof aan tala qaadanin, laheyna aragti siyaasadeed oo muuqata, marnabana Roger kuma fakarin in saaxibkiisa uu ku guleysan doono Doorashada.
Isbuuc kadib markii Roger uu ka diiday saaxibkiisa inuu u noqdo madaxa ol olaha doorashadiisa, waxa uu Donald Trump u magacaabay Stiv Banon jagadan, Ragor ayaana ka qoomameeyey diidmada jagadaas loo soo bandhigay, markii uu Donald Trump kusoo baxay doorashada.
Wuxuu qoraaga Buugan Michel Wolff ka waramayaa ujeedka rasmiga ah ee Donald Trump kalahaa isku soo sharxida doorashada madaxtinimada Maraykanka, isagoona sheegaya in Donald iyo la taliyaashiisa aysan fileynin xilligaas iney ku guuleysan doonaan doorashada, waxayna ku tashadeen iney khasaari doonaan, waxaana Sam nonbirig oo kamid ahaa mas’uuliyiinta ol olaha Trump mar uu waydiiyay Donald Trump sababta uu u doonayo inuu madaxweyne noqdo, jawaabta madaxweynahu noqotay ” waxaan doonayaa inaan noqdo ninka ugu caansan aduunka”.
Wolff ayaa tilmaamaya in isku soo sharxida doorashada keligeed ay ahayd hadafka Donlad Trump, haddii uu guuleysto iyo haddii uu khasaaraba wuxuu mar weliba ogaa inuu helayo caanimada uu doonayay, wuxuuna Donald Trump uu u sheegay saaxbikiisa Roger in laba gooraba isku soo sharxida madaxtinimada Maraykanka uu ka heli doono fursado badan oo waaweyn iyo shuhro ama caanimo ballaaran.
Wuxuu intaa ku darayaa Wolff ” doorashada uu ku khasaaro waxay u ahayd natiijo aan daal lahayn, dhamaan dadkana ay ku farxayaan, sababto ah Trump wuxuu noqon doonaa ninka ugu caansan caalamka, sida uu isagu jeclaa, gabadhiisa Ivanta iyo ninkeeda Jarid waxay noqon doonaan dad caan ah oo safiiro ka ah arimaha ganacsiga, iyagoo horey u ahaa hantiilayaal aan la aqoon.
