Diyaarado dagaal ayaa abaaro sagaalkii fiidnimo ee xalay duqeymo u geystay qaar kamid ah xarumaha adeegga bulshada ee degmada Saakow.
Si gaar ah waxay u beegsadeen isbitalka guud ee magaalada iyo Kollej lagu xanaaneeyo waxna lagu baro caruurta.
Mid kamid ah gantaaladii ay soo tureen ayaa waxa uu dilay sadax kamid ah caruurtii Kollejka iyadoo ay ku dhaawacmeen macallin iyo arday kale.
Qaar kamid ah bulshada magaalada ayaa saaka aroortii aasay sadaxda caruura ah iyadoo xaaladooda lala tacaalayo dhaawaca labada qof oo ah mid sahlan sida aan kasoo xiganay laamaha caafimaadka.
Odayaasha dhaqanka ee magaalada saakow ayaa saaka aroortii booqday xarunta caruurta lagu beegsaday iyo isbitalka, waxaana kamid ah nabadoo cali Cabdi kariin Cali.
Goobta uu gantaalka kula dhacay ardayda ayaa waxaa yaallay kitaab Qur’aan kaas oo aan indhaheyga ku arkay isagoo uu midabeeyay dhiiggii ka qubtay caruurta.
Inkastoo aanu burbur badan ka muuqanayn machadka ay caruurtu wax ku baranaysay, ayaa waxaa haddana hal qeyb oo kamid ah laga dareemayaa inuu saameyn ku yeeshay gantaalka lagu soo riday.
Sidoo kale dayuuradaha ayaa duqeyn ba’an u geystay isbitalka weyn ee magaalada Saakow.
Isbitalka oo ahaan mid muddo aad u fog usoo adeegayay bulshada degmadan ayaa waxay dayuuraduhu la beegsadeen gantaalada ugu badan.
Duqeyntan oo loo badinayo iney iska kaashadeen Mareykanka iyo Kenya ayaa waxay inteeda ugu badan asiibtay isbitalka weyn ee magaalada.
Ilaa sadax gantaal ayay la beegsadeen qeybaha ugu muhiimsan ee isbitalka waxaa ka dhashay khasaarooyin isugu jira burbur dhismaha intiisa badan ah iyo burbur qalabka iyo dawooyinka ah.
