Daka Maraykanka waxaa ka socda dibadbaxyo aad u ballaaran oo ay dhigayaan dhalinyaro is abaabushay oo muslimiin ah, kuwaas oo dowladda Maraykanka ku cambaareynaya duullaankeeda ka dhanka ah shacabka reer Gaza.
Warbaahinta Maraykanka ayaa soo warisay in dibadbaxan ay billowday gabar muslimad ah oo lagu magacaabo Asma Zucayter oo 17 jir ah, taasoo go’aansatay in ay abaabusho mudaaharaad lagu taageerayo qadiyadda falastiiniyiinta oo ka dhacay gobollo badan oo dhaca dalka Maraykanka.
Asma waxay ka mid tahay gabdhaha muslimaadka Maraykanka ee asalkooda kasoo jeeda Falastiin ayaa sheegtay in marka hore ay ka walwalsanayd in ay ku baaqdo banaanbaxyo ka dhan ah Yahuudda, maadaama ay magaaladeedu ku badanyihiin dadka gaalada, balse dibadbaxyada ayaa si deg deg ah ugu faafay, gobollo badan oo dhaca waddanka Maraykanka.
Dhanka kale dibadbaxyo ballaaran oo looga soo horjeedo falalka gurracan ee ay ku keceen waziirka difaaca Maraykanka Lloyd Austin iyo la taliyaha amniga Mareykanka ee ku aaddan dagaalka Gaza, ayaa ka dhacay gudaha dalkaasi Maraykanka.
Dibadbaxan ayaa si gaar ah kaga dhacay afaafka hore ee guriga waziirka difaaca Mareykanka Lloyd Austin, dadyow aad u fara badan oo sitay boorar ay ku xardhan yihiin erayo ka dhan ah waziirkaas ayeyna kaamirooyinku soo qabanayeen.
