Diyaarad ciidan oo ay leeyihiin ciidamada dowladda Maraykanka ayaa ku burburtay meel u dhow xeebaha Koonfureed dalka Japan, sida ay sheegeen saraakiil ciidan oo ka tirsan dowladda Japan.
Diyaaradan millatari ayaa lasoo wariyay inay saarnaayeen illaa 8 xubnood, waxayna dhacday oo ay burburtay xilli ay ku beegnayd xeebaha Yakoshima oo dhaca dhanka Koonfureed ee badda waddanka Japan.
Macluumaad kale oo soo baxay ayaa sheegaya in shilkan diyaaradeed uu ku dhintay mid ka mid ah xubnihii la socday diyaaradda, halka kooxaha ilaalada xeebaha dalka Japaanna ay shaaciyeen inay heleen saddex xubnood, wallow aysan faahfaahin intaas ka baxsan bixin.
Shilkan diyaaradeed ayaa kusoo beegmaya xilli bishii Agoosto ay diyaarad kale ku burburtay waqooyiga waddanka Australia, halkaas oo ay ku dhinteen saddex ka mid ah ciidamada Marines-ka Mareykanka.
