Markii ugu horraysay dowladda Sacuudiga ayaa xaqiijisay in si ulakac ah loo dilay Wariye Jamaal Khaashuqji oo ahaa saxafi mucaarad Sacuudiyaan ah oo lagu dilay magaalada Istanbul ee wadanka Turkiga.
Dacwad soo oogaha guud ee dowladda Sacuudiga ayaa shir jaraa’id oo uu ku qabtay magaalada Riyadh ku sheegay in taliye ku xigeenka sirdoonka Aala Sacuud Ninka lagu magacaabo Axmed Alcaseyri uu amray in ladilo ama lasoo qabtay Wariya Jamaal.
“Taliye ku xigeenka sirdoonka ayaa lahaa amarkii lagu dilay Wariye Jamaal Khaashuqji waxaana socda dadaallo lagula xisaabtamayo 11 kamid ah eedeysanayaasha” ayaa lagu yiri warka kasoo baxay dacwad soo oogaha Sacuudiga.
Dhinaca kale wasiirka arrimaha dibadda Sacuudiga Caadil Aljubeyr ayaa diiday dalab ka yimid dowladda Turkiga oo ku baaqayay in baaritaan caalami ah lagu sameeyo kiiska Wariye Jamaal Khaashuqji.
Dowladda Sacuudiga ayaa waji gabax kala kulantay warbaahinta caalamka kadib markii ay warar is khilaafsan oo been ah kasoo saartay qaabkii loo dilay wariyaha, wasaradda Keydka dowladda Mareykanka ayaa iyana war ay soo saartay ku sheegtay in cunaqabateymo ay kusoo rogtay ragga ugu cadcad in ay ku lug lahaadeen dilkii wariyaha waxaana kamid ah Sacuud Alqadaani iyo Maahir Almudrib.
Maamulayaasha Aala Sacuud ayaa isku dayaya in mas’uuliyadda fal dambiyeedka ay ka fogeeyaan Max’med Bin Salmaan oo ah dhaxal sugaha Boqortooyada.
