Warar dheeraad ah ayaa kasoo baxaya xasuuq daran oo diyaaradaha isbahaysiga Carabta ee Yemen ku duulay ay ugeysteen dad Soomaali qaxooti ah.
Saraakiisha caafimaadka Magaalada Alxudeydah ee wadanka Yemen ayaa sheegay in dhimashada dadka Soomaalida ee lagu duqeeyay doontii ay la socdeen ay gaartay 42 qof oo u badan haween iyo carruur.
Mas’uul u hadlay guddiga caafimaadka Alxudeydah ayaa warbaahinta u sheegay in tobanaan dhaawacyo ah oo ay qaabileen qaarkood ay dhinteen.
Goob joogayaal ayaa sheegay in meydadka 42 qof oo ubadan haween iyo carruur lagu aruuriyay xarunta laanqeyrta Cas ee magaalada Alxudeyda.
Sida uu sheegay naaquudaha doonta la duqeeyay oo lagu magacaabo Ibraahim Cali Ziyaad waxaa shilka ka badbaaday 80 qof Soomaali ah.
Naaquudaha oo lahadlay warbaahinta ayaa xaqiijiyay in gantaallada lagu garaacay doonta ay soo ridday diyaradaha nuuca Apache oo loo malaynayo in ay leedahay dowladda Sacuudiga.
Hay’adda Q.Midoobe uqaabilsan qaxootiga ayaa war ay soo saartay ku sheegtay in dadka la xasuuqay ay wateen warqado aqoonsi ayna kusii jeedeen dhanka wadanka Suudaan.
Sawirro lagasoo qaaday goobta xasuuqu ka dhacay waxaa kasoo muuqanayay meydadka dad Soomaali ah oo daadsan xeebta banaankeeda iyo kuwa kale oo iyagoo dhaawacyo ah loo daad gureynayo goobaha caafimaadka.
Magaalada Xudeydah ee Xasuuqu ka dhacay waxaa gacanta ku haaya Maleeshiyaadka shiicada Xuuthiyiinta oo dagaal ba’an kala dhaxeeyo dowladaha Sacuudiga iyo Imaaraatka Carabta.
Duqeymo ay gudaha wadanka Yemen ka geysteen diyaaradaha isbahaysiga Carabta ayay ku laayeen kumanaan shacab ah iyagoo ku marmarsiyoonaya la dagaalanka Xuuthiyiinta.
