Maleeshiyaadka murtazaqada u ah dowladda Imaaraadka ee RSF loogu yeero ee ka dagaallama Suudaan, ayaa lagu eedeeyay inay kimiyo badan oo Dahab ah ka dhoofiyeen gobolka Daarfuur ee dalka Suudaan.
Guddoomiyaha Koofurta gobolka Darfur, ninka lagu magacaabo Bashiir Mirsal, ayaa ku eedeeyay maleeshiyaadka gurmadka deg degga ah in ay waddankaasi ka dhoofiyeen tiro Dahab ah oo laga soo saaray deegaanka Singho, si loogu maalgeliyo maleeshiyadooda.
Masuulkan oo xaruntiisu tahay magaalada Port Sudan, ayaa sidoo kale wareysi uu siiyay wakaaladda wararka ee Suudaan ku sheegay in hawlaha tahriibinta dahabka ay yihiin qorsheyaal abaabulan oo lagu dhacayo kheyraadka Suudaan, maleeshiyada RSF ayaa la rumeysan yahay in qorshahaasi wakiil uga yihiin Imaaraadka carabta.
Wargayska Al-taghyiir ayaa sheegay in shirkadda Al-Junayd oo gacan saar la leh maleeshiyaadka gurmadka deg degga ah ay hawlo ballaaran oo macdan qodis ah ka wado mandiqadda Al-Radum ee Koonfurta Darfur, gaar ahaan deegaanka Singho, halkaas oo ay ka qodayaan macaadin tira beel ah oo ka mid ah khayraadka Suudaan.
Xoogaga RSF ayaa gacanta ku haya gobolka Koonfurta Darfur, iyo afar gobol oo kale oo ka tirsan waddanka, maleeshiyaadkan ayaa ka mid ah kuwa uu ku adeegto Imaaraadka, kuna gurto khayraadka waddamada muslimiinta.
