Jabhadda Axmaarada u dhadhaqaaqda ee Fano ayaa guulo ka sheegatay dagaalka ay kula jirto ciidanka millatariga ee uu hoggaamiyo Abiy Axmed, kuwaas oo ku duulay gobolka Amhara ee dhaca waqooyiga Itoobiya.
Fano waxay sheegtay in ugu yaraan 500 oo askari oo ka tirsan ciidamada dowladda xabashida ay ku dileen dagaallada maalmihii u dambeeyay ka dhacayay Aagga Gojjam ee ismaamulka Axmaarada.
Asres Mare oo ah gudoomiye ku xigeenka iyo madaxa qaybta siyaasada ee gobolka Gojjam ee jabhadda Fano ayaa waraysi uu siiyay warbaahinta Itoobiya ee Ethiopian Media Services ku xaqiijiyay in boqollaal askari ay ku dileen dagaallada dhowrkii maalmood ee u dambeeyay, halka sidoo kalena ay dagaalladaasi ku qabteen 27 oo ah askar ciidan oo millatariga ka tirsan.
Hub iyo saanado millatari oo xoogan ayuu sheegay masuulkan ka tirsan jabhadda Fano inay ku qabsadeen dagaalladii tooska ah ee todoobaakan ay la galeen ciidanka millatariga ee Abiy usoo diray gobolka.
Ciidanka millatariga Itoobiya waxay dhankooda sheegeen in 31 ka tirsan maleeshiyaadka Fano inay ku dileen dagaallada ka socda Gojjam, basle masuulka u hadlay Fano ayaa sheegashadaasi beeniyay.
Warbaahinta maxalliga Itoobiya, waxay sheegtay in dhowr aag oo kale la isku fara saaray toddobaadka, waxaana ka mid ah goobahaasi Gonder iyo Wollo, halkaas oo todobaadkan dagaalo xoogani ka dhaceen.
Ilo wareedyo ayaa sheegay in khasaare xooggan la gaarsiiyay ciidamada federaaliga ee la geeyay aagga Gonder, tobaneeyo askar ah oo dagaalka in lagu qabtay la sheegay ayay muuqaalladoodu faafiyeen mucaaradka Abiy Axmed.
Dagaalladan ka dhacay Gojjam, Gonder iyo qaybo ka mid ah Wallo, ayaa kusoo beegmaya xilli toddobaadka ay dawladda xabashida ciidamo aad u badan geysay aagga Goojam ee dhaca gobolka Axmaarada, kuwaas oo loogu talagalay inay qayb ka noqdaan qorshaha Abiy ee ah in uu meesha ka saaro jabhadda Fano, taasi oo toddobaadkan dagaallo uu dhiig badan ku daatay kusoo dhaweysay ciidanka ka yimid dhanka Addis-ababa.
