Jabhadda hubeysan ee kacdoonka millatariga kula jirta nidaamka Abiy Axmed, ayaa sheegtay inay si buuxda gacanta ugu dhigtay magaalo istaraatiiji ah oo muddo shan maalmood ah uu dagaal culus ku dhemxarayay labada ciidan.
Fano waxay sheegtay in magaalada Woldia oo ah xarunta gobolka Wallo, sidoo kalena ah magaalo istaraatiiji ah ay si buuxda gacanta ugu dhigeen, kaddib dagaallo culus oo maleeshiyadeedu halkaasi kaga jireen shantii maalmood ee lasoo dhaafay.
Jabhaddu waxay sheegtay in dagaallada shanta maalmood socday ay dhimasho iyo dhaawac ku noqdeen boqollaal askari oo ka tirsanaa ciidanka dowladda xabashida Itoobiya, inkastoo aysan faahfaahin intaas ka baxsan bixin.
Ma jiro wax war ah oo dhanka dowladda xabashida kasoo baxay oo ay ku diidayso mise ku xaqiijinayso sheegashada kacdoonwadeyaasha Axmaarada ee sheegay in magaalada Woldia ee caasimadda u ah gobolka Wollo ee Ismaamulka Amhara.
Sidoo kale waxay Fano sheegtay in dagaallo culus oo maleeshiyadeedu kaga jireen Gojjam lagu qabtay sarkaal sare oo ka tirsan ciidamada millatariga Itoobiya, kaasi oo lagu magacaabo Yared Brehe, waxayna soo bandhigeen muuqaalka sarkaalkaasi oo gacanta ugu jira jabhadda Axmaarada.
Muuqaalka Fano ay sii daayeen ayaa waxaa kasoo muuqanaya sarkaalka ciidan ee lagu qabtay dagaallada Gojjam, isaga oo waraysi bixinaya, dhabarkiisa dambena ay taaganyihiin maleeshiyo badan oo ka tirsan Fallaagada Fano.
