Khasaare laxaad leh oo isugu jira dhimasho iyo dhaawac ayaa ka dhashay dhacdo qarax ah oo laga soo tabiyay qaybo ka mid ah dalka Nigeria, kaddib markii uu dab ka kacay gaari nooca booyadda shidaalka ah oo marayay deegaan dhaca waqooyiga dalkaasi.
Saraakiisha booliska ayaa xaqiijiyay in gaariga booyadda uu rogmaday xilli uu darawalku isku dayay in uu ka gudbo gaari xamuul ah oo uu ka cabsi qabay in uu ku dhaco, balse leexashada uu sameeyay ayaa keentay in uu ku rogmado tuulada Majiya ee ka tirsan gobolka Jigawa ee waqooyiga dalkaasi.
Booliska ayaa xaqiijiyay in khasaaraha dhimasho uu kor u dhaafayo 153 qof, halka dhaawacana uu yahay 100 kale oo ay carruuri ku jiraan, dhaawacyada qaarkood ayay saraakiisha ciidanka boolisku sheegeen in ay yihiin kuwa halis ah.
Khasaaraha ugu badan ayaa yimid markii ay dad badan kusoo xoomeen halka uu gaarigu ku rogmaday si ay boobaan shidaalka ay booyaddu siday, balse qaraxa ka dhashay gaariga ayaa badi gallaaftay sida ay ku warameen goobjoogeyaal.
Sawirro lagu faafiyay baraha bulshada ayaa muujinayay goobta uu shilku ka dhacay oo uu burbur xoog leh ka muuqdo iyo gaadiid basbeelay, waana mid ka mid ah shilalka khasaaraha badan dhaliya ee laga soo tabiyo dalkan dhaca qaaradda Africa.
