Khasaare laxaad leh oo isugu jira dhimasho, dhaawac iyo burbur hantiyeed, ayaa ka dhashay weeraro xoogan oo ay gaysteen kooxo mucaarad ku ah dowladda Pakistan.
Mas’uuliyiin ka tirsan dowladda dabadhilifka ee Pakistan ayaa warbaahinta gudaha u sheegay in in ka badan 60 qof lagu dilay illaa saddex weerar oo ka dhacay gobolka Balochistan ee Koonfur-galbeed dhaca, waxaana masuuliyada weeraradan sheegtay xooggaga xoreynta Balochistan ee kacdoonka hubeysan kula jira dowladda.
Goobjoogeyaal ayaa sheegay in 23 ka mid ah lagu dilay mid ka mida weerarada oo lagu beegsaday bas rakaab ah oo marayey degmada Muusa Khayrl, 10 xubnood oo ka mid ah ciidamada weerarka qaaday ayaa marka hore la sheegay inay joojiyeen baabuurka, kaddibna rassaas oodda uga qaadeen.
Taliska ciidamada xukuumadda dabadhilifka Pakistan ayaa sheegay in ugu yaraan 14 askari oo booliis iyo 21 kale oo dabley ah lagu dilay iska hor’imaad ka dhashay weeraradii ugu waaweynaa ee lagu bartilmaameedsaday basaska iyo gawaarida xamuulka qaada ee marayey waddo weyn oo laami ah.
Xoogagga xoraynta gobolka Baloshistan ayaa ah ciidamo dagaal kula jira dowladda Pakistan, waxayna doonayaan inay maamulka gobolkooda iyo khayraadka ka dhex buuxa iyaga loo daayo meeshana ay dowladdu ka saarto shirkadaha Shiineyska ah ee gacanta ku haya ilaha dhaqaale ee gobolkaasi.
