Mid kamida golaha wasiirrada xukuumadda Xasan Cali Kheyre ayaa ku dhawaaqay in uu iska casilay xilkii uu hayay kadib markii ay dowladda Federaalka fatqalado ka abuurtay magaaladiiuu kasoo jeeday.
Cabdi Fataax Ibraahim Geesey oo ahaa Wasiirkii Howllaha Guud ee DF-ka ayaa si rasmi ah u xaqiijiyay inuu iska casilay xilkii Wasiirnimo, isagoona ku eedeeyay Xukuumadda in ay Faragelin qaawan ku heyso maamulka isku magacaabo Koonfur galbeed islamarkaana ay caburin iyo afduub ku heyso shacabka magaalada Baydhabo.
Isagoo ka hadlayay Shir Jaraa’id oo uu ku qabtay magaalada Muqdisho ayuu sheegay in uusan kasii mid ahaan karin xukuumad hurinaysa colaadda magaalada Baydhabo.
Isacasilaadda Cabdi Fataax Geeseey ayaa imaanaysa xilli ciidamada Xabashida Itoobiya ay arbacadii lasoo dhaafay Baydhabo ku weerareen Mukhtaar Rooboow ayna ugacan geliyeen dowladda Farmaajo waxaana wixii xilligaas ka dambeeyay magaalada ka dhacayay dagaallo iyo iskusoo baxyo rabshada wata.
