Kooxaha muqaawamada Falastiin ee halganka adag kula jira ciidamada gumeystaha Yahuudda ee xoogga lagu dajiyay dhulka barakaysan ee Falastiin, ayaa shaaciyay in hoggaamiyahoodii Yaxye Sinwaar ay dileen ciidamada sahaayinada.
Bayaan kasoo baxay hoggaanka kooxda laguna faafiyay barta rasmiga ah ee aaladda Telegramka ku leeyihiin ayay ku xaqiijiyeen sheegashada maamulka gumeystaha Yahuudda ee ah in gacanta ciidanka Yahuudda uu ku baxay Yaxye Sinwaar oo ah hoggaamiyaha muqaawamada.
Waxay sheegeen in uu dhintay isaga oo la dagaallamaya ciidamada gumeystaha Yahuudda, bayaanka waxaa lagu xusay in muddo labaatan sano ah uu xabsi u ahaa maamulka gumeystaha, kaalin waynna ku lahaa aasaaska kooxaha wax iska caabinta iyo sidoo kale howlgalka Duufaanta Al-aqsaa ee lagu dhiigbixiyay ciidamada Sahaayinda.
Kooxaha wax iska caabintu waxay warsaxaafadeedkooda ku sheegeen in dilka Yazye Sinwaar uu shidaal u noqon doono halganka ay kula jiraan Yahuudda, isla markaana ay sii wadi doonaan dagaalka ka dhanka ah gumeystaha ilaa laga xoreynayo deegaannada xoogga lagu dajiyay.
Yazye Al-sinwaar ayaa iska hor’imaad toos ah la galay ciidamo sahaayino ah, waxayna isaga iyo rag la socday oo ka tirsan kooxaha wax iska caabinta Yahuuddu kula dagaallamen qaybo ka mid ah magaalada Rafax ee Gaza.
