Markii ugu horraysay hoggaanka cusub ee maamulka ashahaada la dirirka ah ee isku magacaabay Somaliland ayaa ka hadlay heshiiskii murunka badan dhaliyay ee Muuse Biixi uu Xabashida Itoobiya ugu saxiixay qeyb kamid ah badda Soomaaliya.
Wasiirka Wasaaradda Dibedda ee maamulka Cabdiraxmaan Cirro oo maanta la kulmay qaar ka mida xubnaha dawaaqidda ee maamulka ayaa ka hadlay arrimo la xiriira MOU-gii Somaliland iyo Itoobiya.
Wasiirka oo la waydiiyey sida uu u arko is afgaradkii sannadkii hore bishan oo kale ay kala saxiixdeen Muuse Biixi iyo Abiy ayaa yiri “ilaa immika ma jirto meel aan ku aragnay MOU-gaas oo aan ka ahayn intii aan ka maqalney Muuse Biixi iyo Itoobiya”.
Dhanka kale waxa uu sheegay in ay ictiraafka meel walba u galayaan laakiin aanay cadaabta u galayn ama dalka u xaraashayn isagoo ula jeeday in aysan geli doonin qar iska xoornimo halis weyn keeni karta.
“Ictiraaf meel walba waan u galaynaa laakiin ictiraaf cadaabta u gali mayno umaddayadana u baabiin mayno…haddii aan waddankeenna iyo khayraadkeenna dadkale siinno laakiin lana ictiraafo macno samayn mayso” ayuu yiri wasiirka arrimaha dibadda maamulka Somaliland.
Waxa kale oo uu intaa ku darey keliya in ay MOU-ga aqbalayaan haddii uu danta maamulka Somaliland ka turjumayo. Hadalkan ayaa ku soo beegmaya xilli uu Xasan Gurguurte heshiis la galay Itoobiya kaas oo Itoobiya loogu oggolaaday marin badeed.
Hadalka kasoo yeeray maamulka isku magacaabay Somaliland ayaa siyaabo kala duwan loo fasiray, dadka qaar ayaa aaminsan in maamulka Cirro markii uu arkay in heshiiskii Muuse Biixi aysan cidi daneynayn uu go’aansaday in ay madaxa dhulka ka ceshtaan, halka dadka qaar ay u arkaan in maamulka cusub uu raad gurayo ficilladii uu horay usameeyay Muuse Biixi Cabdi.
