Warar dheeraad ah ayaa kasoo baxaya xasuuq dad shacab ah xalay loogu geystay Koonfurta magaalada Gaalkacyo ee gobolka Mudug.
Wararka ka imaanaya Gaalkacyo ayaa sheegaya in maleeshiyaad katirsan maamulka Galmudug ay dad shacab ah oo gaaraya 9 qof ay ku toogteen Koonfurta magaalada Gaalkacyo.
Dadka lalaayay ayaa ahaa ganacsato iyo Macalimiin kasoo jeeda gobollada Bay iyo Bakool ee Koonfurta dalka Soomaaliya, goob joogayaal ayaa warbaahinta u sheegay in dadka shacabka ah si jamaaci ah loo xasuuqay waxayna meydadkooda lageeyay isbitaal kuyaal isla magaalada Gaalkacyo.
Dhacdadan ayaa imaanaysa xilli maalmihii lasoo dhaafay uu maamulka isku magacaabay Galmudug uu hanjabaadu hawada umarinayay shacabka kasoo jeeda gobollada Bay iyo Bakool ee mehradaha ganacsi ku leh magaalooyin ay kamid yihiin Dhuusamareeb iyo Guriceel.
Falkan wuxuushnimada leh ee lagu laayay dadka shacabka ah ayaa qeyb ka ah gabood fallada ay bulshada ku hayaan maamullada dabadhilifyada ah ee ku xiran Xabashida Itoobiya iyo waxa loogu yeero beesha caalamka, maamulka Puntland ayaa horay deegaannada uu ka arrimiyo ugasoo eryay ganacsatada kasoo jeeda Bay iyo Bakool.
