Gobolka ay dowladda Kenya ula baxday waqooyi bari oo ah dhul ay leeyihiin dadka Soomaaliyeed ee muslimiinta ah ayaa marti gelinaya shilal diyaaradeed oo aad u xooggan, kuwaas oo sababay burburka saddex diyaaradood oo ay leeyihiin ciidanka cirka ee Kenya.
Shilka diyaaradeed ee ugu dambeeyay ayaa laga soo wariyay inuu ka dhacay ismaamulka Gaarissa, halkaas oo uu ku dhintay masuul sare oo ka tirsan dowladda Kenya, kaas oo Kenya usoo magacowday baaraha imtixaannada guud ee xarumaha waxbarashada Kenya.
Shilkan ayaa si gaar ah uga dhacay tuulada Ijaara oo hoostagta degmada Gaarissa, waxaana la wariyay in diyaaradda uu shilka ku galay masuulka Kenyaanka ah ay ahayd diyaarad helicopter ah, warbaabinta maxalliga ah ee Kenya ayaa xaqiijisay in ninkan uu dhintay kaddib markii ay ku dhacday diyaaradda helicopters-ka.
Dhanka kale ciidamada cirka Kenya ayaa shaaciyay inay waxyeello xooggan kala kulmayaan diyaaradaha helicopter-ka ah, xilli diyaarad nooceedu yahay Mil Mi-171E ay ku burburtay deegaanka Buna oo hoostaga gobolka Wajeer ee dhulka NFD.
Taliska ciidanka cirka ee Kenya ayaa sheegay in diyaaradan oo ah nooca qumaatiga u kaca ay ku guda jirtay howlo ay ka waday magaalooyinka Mooyaale ee ismaamulka Marsabit iyo Buna oo hoostaga Wajeer, waxayna sheegeen in dadkii rakaabka ahaa ee la socday diyaaradda ay ka badbaadeen shilka wallow ay iyadu burburtay.
Shilkan labaad waxaa kasii horreeyay shil kale oo shalay ka dhacay garoonka Wajeer, halkaas oo ay ku dhaawacmeen laba sarkaal oo Kenyaan ah iyo nin duuliye ka ahaa diyaarad yar, kaddib markii ay kula dhacday garoonka, wax ka yar hal daqiiqo markii ay ka duushay garoonkaasi.
