Waxaa soo baxaya warar sheegaya suuragalnimada in ciidamada Mareykanka mar kale laga saaro Soomaaliya, haddii Donald Trump uu la wareego xafiiska ugu sarreeya dalkaasi.
Tallaabadan ayaa noqon karta mid lagu yareynayo joogitaanka millatariga Mareykanka ee qaaradda Afrika, si xoogga loo saaro gobollada kale ee muhiimka ah, sida uu qoray joornaalka stripes ee kasoo baxa Maraykanka, kana faallooda arrimaha ciidanka.
Warbixinta ayaa lagu sheegay in dadka hagaya siyaasada mamulka cusub ee trump ay aaminsanyihiin in Soomaaliya aysan hadda ahayn mid Mareykanka ku bixin karo kheyraad iyo askar dheeraad ah, sida uu jornalkan u sheegay ninka lagu magacaabo J. Peter Pham, oo hore u ahaa ergayga gaarka maamulkii Trump ee gobollada Saaxilka Afrika.
Warbixinta ayaa sidoo kale lagu sheegay musuq maasuqa baahsan ee ka dhex jira maleehiyada militariga Riddada, gaar ahaan ciidanka Danab ee maraykanku tababaro, taasi oo keentay su’aalo ku saabsan sida loogu sii wadi karo taageerada millatariga ee Maraykanku siiyo kooxda Riddada, iyadoo aan la helin lammaane lagu kalsoonaan karo.
Siyaasiyiinta u dhaw maamulka Donald Trump ayaa walaac ka muujinaya in Mareykanku waayi karo mudnaanta uu ku leeyahay gobollada muhiimka ah sida Aasiya, maadaama uu weli ku mashquulsan yahay qaaradda Afrika.
Ninka lagu magacaabo Elbariij kolbi, oo Trump u magacaabay inuu noqdo ku xigeenka siyaasadda Wasiirka Gaashaandhigga, ayaa sheegay in Mareykanka uu si aad ah ugu firdhisan yahay qaaradda, lagana fiirsado sida ugu wanaagsan ee loo xoojin karo joogitaanka Baasifigga.
Taliska AFRICOM, oo fadhigiisu yahay magaalada Stuttgart, ee Jarmalka, ayaa Soomaaliya ku leh boqollaal askari oo inta badan taageero u fidiya cutubyo ka tirsan ciidanka Riddada somaliya. Taliyeyaasha Mareykanka ayaa hore u sheegay in qaabkan uu wax badan ka caawin karo la-dagaallanka mujahidiinta Al-Shabaab, laakiin walaaca ka dhashay inaysan jirin horumar muuqda ayaa mar kale soo cusboonaaday.
Warbixinta ayaa sheegtay in qaar ka mid ah saraakiisha Mareykanka ay ku eedeeyeen AFRICOM inay buunbuuniyaan khataraha ka imaan kara Somalia, si ay u helaan agab dheeraad ah, iyadoo qaar ka mid ah qiimeynta khataraha aysan waafaqsanayn xaqiiqada dhabta ah ee meesha ka jirta.
J. Peter pham ayaa ugu dambeyntii ku baaqay in si buuxda dib loogu qiimeeyo siyaasadda Mareykanka ee Soomaaliya, isagoo sheegay in qaabka hadda jira uu noqday mid fashil ah.
“Ka hor inta aan Mareykanka gelin Somaliya juhdi dheeraad ah , waa in la sameeyaa dib-u-eegis ballaaran oo ku saabsan Soomaaliya oo ah dawlad fashilantay,” ayuu yiri.
Hadalkaas ayaa sii xoojinaya dooddii hore ee ku saabsanayd in Mareykanku uu u baahan yahay inuu qaato siyaasad cusub oo ku saleysan danihiisa mustaqbalka fog.
