Warar kala duwan oo faahfaahsan ayaa kasoo baxaya dhacdo si wayn looga hadal hayo dalka Koonfur Afrika, kaddib markii lasoo wariyay inay dhinteen ugu yaraan 100 xubnood oo macdan qodeyaal ah.
Dhacdada ayaa timid, kaddib markii dowladda Koonfur Afrika muddo hadda laga joogo laba bilood ka hor ay sahayda ka jartay kooxo lagu eedeeyay inay si sharci darro ah ku guranayeen macdan ku jirta god kuyaal deegaan lagu magacaabo Stilfontein.
Go’doominta dhanka cuntada iyo biyaha ee ay dowlada Koonfur Afrika kusoo rogtay macdan qodeyaasha ayaa keentay in gaajo iyo haraad ay halkaas ugu dhex dhintaan ugu yaraan 100 xubnood, kuwaas oo 78 ka mida maydadkoda maanta lasoo saaray, sida ay sheegeen goobjoogeyaal.
Booliska ayaa shaaciyay in lasoo saaray maydadka 78 xubnood iyo 160 kale oo nool, balse ay ka muuqdeen daal iyo tabar yari, maadaama ku dhawaad laba bilood aysan helin cunto iyo biyo ku filan, taasina ay keentay inay godka ku xayirnaadaan.
Dowladda Koonfur Afrika waxay ku doodday in macdan-qodeyaasha ay ka dhaga adeegeen amarkeeda oo ahaa inay booliska isku dhiibeen, maadaama ay ku eedaynayso inay si sharci darro ah ku qodanayeen macdanta dahabka, waxayna taasi keentay inay ka jarto cuntada iyo biyaha bishii November ee sannadkii tagay 2024-kii.
Gurmadka hadda socda ayaa yimid kaddib amar kasoo baxay maxkamadda dalkaasi, waxayna ilo wareedyo sheegeen in mid ka mida dadka ay dowladda Koonfur Afrika ku go’doomisay godka uu xiriir la sameeyay ehelkiisa, kuwaas oo codsaday in gurmad looga baahan yahay aaggaasi, waxay wararku intaas ku dareen in samatabixintu qaadan karto maalmo dheeraad ah.
Godkan ayaa dhulka hoostiisa qodan qiyaastii 2km ama (1.5 mayl), waxaana la rumeysan yahay inay dhulka hoostiisa ku go’doonsanyihiin dad hor leh, Ap waxay sheegtay in kooxaha samatabixintu ay mid mid usoo saarayaan dadka halkaas ku go’doonsan iyo sidoo kale maydadka, sababo la xiriira ciriiriga ka jira godka.
Kooxaha sheegta inay u doodaan xuquuqda aadanaha waxay eedaymo culus u jeediyeen dowladda Koonfur Afrika, waxayna sheegeen inay ka dambeysay geerida dadka la xaqiijiyay, maadaama ay cuntada iyo biyaha ka jartay, si ay usoo baxaan, xukuumaddu waxay dhankeeda ku andacooneysay in macdan-qodeyaashu awoodeen inay godad kale kasoo bixi kareen balse ay dhagaha ka fureysteen baaqyadeeda, cabsi ay ka qabaan xarigga.
Booliska ayaa sheegay in dhammaan dadkii horay usoo baxay iyo kuwa dib laga soo saaray ay gacanta ku hayaan, waxay sidoo kale intaas ku dareen in ay gacanta ku dhigeen Dahab, Walxo qarxa, hub iyo lacag dhan 2 Milyan oo dollar oo ay haysteen macdan qodeyaashu.
