Ciidamo ka tirsan millatariga dowladda xabashida Itoobiya ayaa rassaas xooggan ku furay dibadbaxayaal caraysan oo kacdoon ka waday magaalada Ayshaca oo ka tirsan magaalooyinka gobolka Siti ee dhaca dhulka Soomaali galbeed ee ku hoos jira gumeysiga xabashida.
Isku soo baxyadan oo ahaa kuwa ballaaran oo ay wadaan Soomaalida ku dhaqan gobolka Siti ee ku hoos jira gumeysiga xukuumadda Addis Ababa ayaa looga soo horjeedaa xasuuq ba’an oo ay wadaan ciidamada federaalka Itoobiya, gaar ahaan barakicinta ay ciidanku ku hayaan shacabka ku dhaqan magaalooyinka gobolkaasi Siti.
Ilo wareedyo maxalli ah ayaa soo wariyay in kacdoonwadeyaashu ay axaddii lasoo dhaafay ku guuleysteen inay xirtaan waddada muhiimka ah ee aadda Jabuuti, balse markii dambe ciidamada Itoobiya ayaa awood ciidan oo ay u adeegsadeen dadka shacabka ah dib u furay waddada.
Ugu yaraan 2 qof ayaa la xaqiijiyay inay ciidamada xabashidu toogasho ku dileen, xilli ay isku dayayeen inay awood ciidan ku hakiyaan bannaanbaxyada looga soo horjeedo Military-ga oo ka socday magaalada Ayshaca.
Mustafa Maxamed Ibraahim oo ka mid ah odayaasha Soomaalida ah ee ku dhaqan gobolka Siti ayaa eedeyn xooggan u jeediyay ciidamada federaalka Itoobiya, isagoo ku eedeeyay inay ciidamada millatarigu si khasab ah dad shacab Soomaali ah oo si nabad ah u deganaa magaalooyinkooda ay ka barakiciyeen gobolka Siti.
Wuxuu dadka shacabka ku dhaqan gobolka Siti ee qaflada ku jira ku booriyay inay ka dhiidhiyaan xasuuqa iyo barakicinta ay ciidamada federaalka Itoobiya ku hayaan shacabka Soomaalida ah ee ku dhaqan magaalooyinka gobolka Siti.
