Ciidamada millatariga Itoobiya ayaa xasuuqyo cusub ka gaystay deegaanka Axmaarada, halkaas oo sannadkii tagay uu ka billowday kacdoon aad u xooggan oo ka dhan ah dowladda uu hoggaamiyo Abiy Axmed, kaddib markii ay soo rogtay amarka lagu kala dirayo booliska gaarka ah ee ismaamullada waddankaasi.
Ilo wareedyo deegaanka ah ayaa xaqiijiyay in ciidamo ka tirsan millatariga Itoobiya ay in ka badan 50 qof oo shacab Axmaaro ah ku dileen magaalada Merawi ee dhacda woqooyiga Gojjam ee gobolka Axmaarada, wallow khasaaraha uu intaas ka badan yahay.
Magaalada xasuuqa ugu daran ay ka gaysteen ciidamada Abiy ee Merawi oo qiyaastii 35-km u jirta xaruunta gobolka Axmaarada ee Bahir-dar waxay dagaallo culus ku dhexmareen ciidanka millatariga iyo kuwa Faano, kadib markii ay millatarigu dhowr jiho weerar kaga qaadeen dadka deegaanka Axmaarada, kaasoo ay ku dhinteen dad badan.
Xafiiska xuquuqul insaanka Itoobiya ee xaruntiisu tahay Bahir-dar ayaa warbaahinta u xaqiijiyay in ilo kala duwan ay ka xaqiijiyeen weerar lagu dilay dad rayid ah oo aan hubaysnayn oo ku sugnaa magaalada Merawi, waxayna intaa ku dartay in dhacdadan xasuuqa ah ay dhacday dhowr maalmood ka hor, ilo dhanka caafimaadka ah waxay sheegeen in inta badan dadka deegaanka lagu dilay guryahooda, halka qaarna lagu dilay waddooyinka.
29-kii January 2024 waxaa magaaladan ka dhacay dagaal culus oo u dhaxeeya kooxda Fano iyo ciidanka Abiy, waxay taas keentay in ciidanka millatarigu dilaan inka badan 115 qof oo Axmaaro ah oo aan hubeysnayn, kororka numberka dhimashada ayaa ah mid marba marka ka dambeeya sii kordhaya.
Xasuuqa ayaa lasoo waroyay in uu billowday kaddib markii ciidanka Fano ay magaalada isaga baxeen, ciidanka ayaa lasoo wariyay firxadka Fano kaddib inay bilaabeen inay dadka guri guri ugu galaan kuna dhex dilaan halka kuwa kale na ay wadooyinka ku dilayeen, sida ay xaqiijiyeen dad goob joogayaal ah oo sheegay in weerarku socday dhowr saacadood oo xiriir ah.
“Markii hore waxay yimaadeen gurigayga oo ay baaritaan bilaabeen, laakiin markii aan u sheegay qofka aan ahay oo aan iri waxaan ahay nin baadari ah, waa ay baxeen. dabadeed na waxay galeen gurigii walaalkay oo way kaxeysteen, wuxuu intaas ku daray in walaalkii ay si bareer ah u dileen ciidanka.
