Magaalada Laas-caanood waxaa weli ka socda dagaalka u dhaxeeya maleeshiyaadka kala taabacsan dadka deegaanka iyo kuwa maamulka ashahaada la dirirka ah ee Somaliland, ka gadaal markii ay saaka maleeshiyaadka Somaliland soo weerareen magaaladaas.
Dagaalka oo markale dib u qarxay ayaa xooggiisa maanta laga soo tabiyay bariga magaalada Laas-caanood, halkaas oo ay dagaallo xooggan ku dhexmareen labada maleeshiyo.
Ilo wareedyo maxalli ah ayaa sheegay in khasaare kala duwan oo isugu jira dhimasho iyo dhaawac ba uu ka dhashay dagaalka kuwaas oo soo kala gaaray dhinacyada iyo dadka rayidka ah ee lagu dul dagaallamay.
Muuqaallo lagu baahiyay mareegaha internet-ka ayaa muujinayay maydadka askar ka tirsan maleeshiyaadka maamulka Riddada ee fadhigiisu yahay Hargaysa, kuwaas oo daadsan waddooyinka iyo duleedyada magaalada, waxaa sidoo kale jira khasaare soo gaaray maleeshiyaadka taabacsan dadka deegaanka wallow aan tirakoob rasmi ah la helin.
Goobjoogeyaal ayaa soo sheegay in maleeshiyaadka ashahaada la dirirka ah ee uu hoggaamiyo Muuse Biixi Cabdi, ay si indha la’aan ah hubka cul-culus ugu garaaceen xaafadaha magaalada, taasi oo keentay khasaare dhimasho iyo mid dhaawac oo soo gaaray dadka shacabka ah.
Inta la xaqiijiyay ugu yaraan 7 carruur iyo hooyadood ayaa ku dhintay mid ka mid ah hoobeyaasha ay maleeshiyaadka Riddada Somaliland ku garaaceen xaafadaha magaalada Laas-caanood, kuwaas oo maydadkooda la dhigay goobaha caafimaadka.
Xaaladda guud ee magaalada Laas-caanood ayaa maanta ah mid cakiran, war kasoo baxay odayaasha dhaqanka Sool ayaana lagu sheegay inay ka baxeen maamulka uu madaxa u yahay Muuse Biixi, iyagoo ku baaqay in la iska dulqaado maamulkan.
