Koonfurta Lubnaan waxaa ka socda duqaymaha iyo dagaallada tooska ah ee u dhaxeeya ciidanka maamulka Yahuudda iyo ururka shiiciga ah ee Lubnaan, halkaas oo lasoo wariyay in saraakiil iyo askar badan looga dilay sahaayinada.
Ururka shiiciga ah ayaa sheegay in tirada dhimashada ciidamada Yahuudda maanta oo Khamiis ah kaliya ay ahayd 17 xubnood oo isugu jira saraakiil iyo askar, taasi oo ah dhiig bax daran oo ku dhacay ciidanka sahaayinada, khasaaraha ugu badan ayaa kasoo gaaray qarax aad u xooggan oo lagu beegsaday goob ay ku kulansanaayeen oo kutaal xuduud beenaadka Falastiin iyo Lubnaan.
Dhinaca kale, ciidamada maamulka Yahuudda waxay qirteen in sarkaal iyo hal askari looga dilay dagaallo dhexmaray iyaga iyo maleeshiyaadka shiicada, kuwaas oo Arbacadii ka dhacay koonfurta Lubnaan.
Qaraxyada ugu xooggan ayaa maanta ciidanka gumeystaha ku qabsaday galbeedka Marun al-Ras oo dhacda koonfurta Lubnaan, halkaas oo warbaahinta gumeystuhu sheegtay inay kasoo degteen diyaarado nooca kuwa qumaatiga u kaca, si ay u daabulaan askarta dhimatay iyo kuwa dhaawaca ah, waxayna tilmaameen inay xaaladdu tahay mid cakiran, ciidanka la beegsaday ayaa ah guutada Juulaan ee sida gaarka ah u tabobaran.
